LEMBAGA ADAT

LEMBAGA ADAT MELAYU adalah lembaga yang ada di Kelurahan Sengeti yang membantu Lurah Sengeti untuk membina dan melestarikan budaya dan adat istiadat serta hubungan antar tokoh adat dengan Pemerintah Kelurahan

ADAT PERKAWINAN DIKELURAHAN SENGETI

1. PENETAPAN JODOH ( MASA BARUNDING )

TEGAK BATURUT DUDUK BATANYO

( SIRIH BATURUT PINANG BATANYO )

BISMILLAH HIRROHMANIRROHHIM

ASSALAMUALAIKUM WARAHMATULLAHI WABAROKATUH

PIHAK NANG DATANG ( LAKI – LAKI )

Terlebih dahulu kami mohon maaf, andai kato kedatangan kami ko telah mengganggu Bapak – bapak dan Ibu – Ibu. Kedatangan kami kerumah nang bapagar adapt, laman nang basapu undang, tepian nang bapagar iko, diutus oleh adik kami yang bernamo……………………….suami isteri, kami ko nak nyampekan sirih nang sakapur, rokok nang sabatang, tando dating untuk batanyo, karma pada waktu nang silam, anak kemenakan kami nang banamo…………………….. ruponyo bausik sirih baguro pinang dengan anak kito nang dirumah iko nang banamo…………………..kemenakan kami ruponyo hatinyo sudah tapaut pandangannyo sudah tatumbuk, nang idak dapat dialih pado anak kito nang dirumah iko nang banamo…………………..diok kapengen bakampuh nak lebar, baulas nak panjang, kabukit diok samo nak mendaki, kelurah diok nak samo manurun, oleh karena itu sekironyo idak kecik tuak nang gedang, idak kan menjadi ampo padi disawah, dak ado hal nang menghalang, dak ado pagar nang magempang, dak ado unak nang mengait, kami nak dating anak kito nang ado dirumah iko, nak kami dudukkan dengan kemenakan kami nag kami sebutkan tadi, sebagai tando kami lah dating batanyo, kami serahkan bungo nang batangke buah nang batampuh ( sambil menyerahkan tepak sirih ).

PIHAK NANG NUNGGU ( PEREMPUAN )

Datuk – datuk sebalah pihak nang kami hormati, jika itu maksud kedatangan datuk – datuk kerumah kami ko, yaitu nang menanyokan keadaan anak gadis kami nang dirumah iko, umurnyo baru setahun jagung, darah baru setampuk pinang, dan akalnyo belum salilit talunjuk, anak kami tersebut kalu kecik belum banamo, gedang belum bagelar dan belum ado sirih baturut pinang batanyo.

Oleh Karena itu kedatangan datuk – datuk ko, kalu kecik tapak tangan niru kami tadahkan, kalu kecik niru laman kami bentangkan, bagi kami tuah akan dating, untung akan tibo, kareno kalu anak kami anyut, alah ado bakal marenanginyo, kalu diok tenggelam alah ado bakal menyelaminyo, tapi datuk – datuk, anak memang anak kami, waris ado disanak memannyo, kami Cuma memasukkannyo sore ngeluarkannyo pagi, haus nak kami bagi aek, lapar nak kami bage makan.

Tapi nang makan ngabisi netak mutusi adolah sanak memannyo, oleh karena itu hal iko nak kami sampekan kepado sanak memannyo, samo –samolah kito bado’ a supayo jangan ado batang nang melintang, pagar nang mengempang dan unak nang mengait, kami harapkan datuk –datuk basabar, menunggu kabar dari kami, paling cepat 3 ( Tigo ) hari lagi, kami utus keluargo kami untuk memalikkan tepak sirih dari datuk iko, kalulah tepak sirih nang kami balikkan itu isinyo kosong, berarti kami persilokan datuk tuk dating melamar, tapi kalu tepak sirih nang kami balikkan isinyo masih lengkap, mako datuk – datuk belum dapat dating nak melamar anak kami.

Demikianlah datuk – datuk kami ucapkan terima kasih.

WABILLAHI TAUFIQ WAL HIDAYAH

WASSALAMUALAIKUM WARAHMATULLAHI WABAROKATUH

2. ACARA PINANGAN MELAMAR ATAU

NGANTAR TANDO

BISMILLAH HIRROHMANIRROHHIM

ASSALAMUALAIKUM WARAHMATULLAHI WABAROKATUH

PIHAK NANG DATANG ( LAKI – LAKI )

Datuk – datuk tuo – tuo tengganai alim ulama cerdik pandai, serto nang tinggi nampak jauh, nang dekat jolong basuo, nang menapik mato pedang, nang manentang mato ari, nang bajalan dulu salangkah, nang bakato lebih sapatah, serto sagalo kito nang ado dirumah nang sebuah iko, rumah nang diatas batutup bubu8ngan perak, dibawah nang baalaskan sendi gading, rumah nang bapagar adapt, laman nang basapukan undang, tepian nang bapagar baso, nang kecik dak kami sebutkan namonyo, nang gedang idak kami panggil gelarnyo.

“ SEIRING BALAM DENGAN BAREBAH

BAREBAH ADO DIDAUN BULUH

SEIRING SALAM DENGAN SEMBAH

SEMBAH KAMI SUSUN JARI NANG SEPULUH “

“ LAPUN MELAPUN KAMUARO

KERAP – KERAP KEANGSO DUO

AMPUN – AMPUN KEPADO NANG TUO

MAAF – MAAF KEPADO NANG MUDO “

Adolah kedatangan kami sebanyak iko, iyolah ndak batanyo agak sepatah, nak numpangbarunding agak sabaris, kalu dululuskan oleh datuk – datuk syukur Alhamdulillah, kalu idak yo terimo kasih.

PIHAK NANG NUNGGU ( PEREMPUAN )

Datuk – datuk nang dating, sebalum kito bacakap ba andai – andai, bagi lurus kami nak batanyo, siapo sebanarnyo datuk – datuk nang dating iko, kalu kedatangan datuk – datuk iko idak mawak cekak dengan kelahi, idak mawak tail dengan neraco, yo kami terimo dengan senang hati, kecik tapak tangan niru kami tadahkan, kecik niru laman kami bentangkan, cobolah datuk – datuk katokan.

PIHAK NANG DATANG ( LAKI – LAKI )

Kalu sabunyi itu kato datuk –datuk, itulah nang sabenarnyo kato, adapun kami nang dating iko, ibarat kudo pelajang bukit, ibarat biduk sampan pelayangan, jadi parang perancah semak, jadi gajah pengangkut cabe, dipanggil kami ko dating, disuruh kami ko pergi, sebagai paulas jari penyambung lidahdari sirih nang barumpun, ayam nang barinduk, iolah saudara kami ………………………. Duo laki bini dari Desa/Kel/Rt…………………….. kedatangan kami ko iolah nak mencari rumah nang batangganai, luak nang bapanghulu, kampong nang batua, negeri nang babatin, ranto nang bajenang, alam nang barajo yaitu rumah saudara kito …………………………….. menurut kabar angina iolah iko rumahnyo, kedatangan kami ko idaklah mawak cekak dengan kelahi, idak mawak tail dengan neraco, kami tau dikadar diri.

Sebalum kami menyampaikan maksud kami dating kemari, sebagai mano adapt nang taecoh pake disiko, kalu batanyo selepas litak, barunding saabis penat, oleh kareno kami ko tadi ado dibawakkan sirih agak secabik, pinang agak sekacip, rokok agak sebatang kami persilokan dulu datu – datuk makan sirih kami ko agak sekapur, isap rokok kami agak sebatang, sambil dengarkan serambah orang tuo pantun anak mudo.

“ GEMUTUB BUNYINYO GENDANG

GENDANG SEBO MUARO JAMBI

SIRIHNYO KALUKUP PINANGNYO MUMBANG

IKOLAH NANG ADO PADO KAMI “

1

Nak duo pantun sairing :

“ SIRIH KUNING DIDALAM NAMPAN

SEMAK JERAMILAH JADI SESAP

SESAPPUN LAH JADI RIMBO GANO

SIRIH KAMI MOHON DIMAKAN

ROKOK KAMI MOHON DIISAP

SEMBAH KAMI MOHON DITERIMO “

PIHAK NANG NUNGGU ( PEREMPUAN )

Terimo kasih datuk – datuk atas perkenalannyo, memang iko nian nang kami tunggu selamo iko, raso batambah gedangnyo tumbuh, raso batukuk tingginyo badan, intan jugo nang batambah tuo, gunung jugo nang batambah tinggi, kalu tadi datuk mengatokan kalu batanyo salepas litak, barunding seabis penat, memang benarlah kato datuk tu, ikolah adapt nang taeco pake dibumu sepucuk jambi sembilan lurah provinsi jambi, sampelah kebumi sailun salimbai kabupaten muaro jambi, sampe pulo kebumi Akso Dano Seti Dirajho Kelurahan Sengeti, memang kalu batanyo tu salepas litak, kalu barunding yo saabis penat, dikami kini ko kenyok besego basamo merah, batimbang nak samo berat, kenyok kasih nak dibalas dan nak diganti, tapi sebagai penantik nang tibo penunggu nang dating, kami ko ado jugolah sirih barang secabik, pinang barang sakacip, untuk itu kami persilokan jugo datuk – datuk makan sirih kami ko agak sakapur, isap rokok kami agak sabatang, sambil dengarkan jugo serambah orang tuo pantun anak mudo :

“ GEMUTUB BUNYINYO GENDANG

GENDANG SEBO MUARO JAMBI

KALU SIRIHNYO KALUKUP PINANGNYO MUMBANG

IKOLAH NIAN MAKANAN KAMI SEARI – ARI “

Nak Duo Pantun Sairing :

“ SIRIH KUNING DIDALAM NAMPAN

SEMAK JERAMILAH JADI SESAP

SESAPPUN LAH JADI RIMBO0 GANO

SIRIH KAMI JUGO MINTAK DIMAKAN

ROKOK KAMI MOHON DIISAP

TANDO SEMBAH SUDAH KAMI TERIMO “

PIHAK NANG NUNGGU ( PEREMPUAN )

Datuk – datuk dari suku nang sebelah kampong nang sabagi, kini ko yo sirih lah sudah kito makan, rokoklah samo kito isap, serilah balik kemuko, darahlah balik kabadan, litaklah ilang, penatpun lah lepas, kini ko kami persilokan datuk – datuk menyampekan apo maksud dan hajatnyo datng kemari.

PIHAK NANG DATANG ( LAKI – LAKI )

Macam ko datuk – datuk, idak kami sebutkan datuk – datuk pun lah tau, bahwa anak buah kemenakan kami nang banamo………………………….Bin……………………….selamo iko dioklah bausik sirih baguro pinang, dengan anak kemenakan datuk disiko nang banamo………………………Binti……………………………. Kini tu ikatan kasih saying antar diok baduo lah meningkat, pengen nak duduk basanding, apo kami katokan macam tu, kareno anak buah anak kemenakan kami lah tibo kepado kami nang tuo – tuo, mengatokan, lah pengen nak nilu menaladani orang nang banyak, nak barumah tango dengan anak buah anak kemenakan datuk, sebenarnyo malu nian kami nak dating kesiko, raso dak tatampik mato pedang, raso dak tatentang mato ari, idak halus makanan diperut, dak layak bakal jodoh, anak pungguk merindukan bulan, tapi nak kami apokan datuk – datuk, hati lah samo bakutuk, mato lah samo basetan, malu – malu muko diusap, pedih – pedih hati ditekan, sampe jugo kami kerumah datuk ko. Apokah anak buah anak kemenakan datuk tu, ibarat bungo, apolah ado orang nang mamegang tangkenyo,kalu belu ado, apo boleh kami nak mamegang tangkenyo.

2

PIHAK NANG NUNGGU ( PEREMPUAN )

Dari hal datuk –datuk tu, kami ucapkan terimo kasih dan syukur alhamdulillah, Cuma sebelum pertanyaan datuk tu kami jawab, cobo datuk pikirkan nian abis – abis, ematkan nian sudah – sudah, jangan bapikir sekali lalu, emat sekali sudah, isuk ko tibo dibukit, cinto di aek, tibo dilurah cinto diangin,tapi kalu pandangan jauh lah dilayangkan, pandangan dekat lah ditukikkan, kalu luko idah teraso pedih, kalu mati idak meraso menyesal, sanggup ilang berani mati, sekendak datuk – datuk, duo tigo kendak kami, kalu cakap datuk tu dari mulut sampe ke ati, kami yo bacipitbapegang tando, kalu jauh dapat ditengok, kalu dekat dapat dirabo.

PIHAK NANG DATANG ( LAKI – LAKI )

Nampaknyo datuk –datuk dari suku nang sabelah kampong nang sabagi, kurang percayo kepado kami, takut tabudi ditempat nang nyato, takicuk ditempat nang terang, jangan cemas datuk – datuk lah kami agak dulu baru dibagi, lah kami ajak dulu baru dititih, kalu luko kami idak meraso pedih, kalu mati idak nyesal lagi. Tadi datuk – datuk ngatokan, kok dipicit memegang tando, memang itu nian maksud kami dating kemari, kareno adapt mengatokan :

“ GENDANG KULIT BAKELIKIR AKAR

GEDANG SIALANG LANTAK BAJAJAR GEDANG ORANG CIRI BATANDO

IKOLAH DARI KAMI, MOHON DITERIMO

DAN KAMI IRINGI DENGAN SEBUAH PANTUN SALOKO “

“ AYAM BAKUKUK ARI NAK SIANG

SEDANG ELOK PEGI MANDI

CINCIN SABENTUK TANDO BATUNANGAN

KAIN SAPALULUSAN TANDO NAK JADI “

PIHAK NANG NUNGGU ( PEREMPUAN )

Sebelum tando dari datuk ko kami terimo dan kami pegang, elok kito mintak pendapat kepado pemangku adapt nang ado disiko, apo – apo be adapt pelamaran nang taecoh pake disiko, kepado nang kami mulyokan datuk pemegang adapt di Desa / Kelurahan ……………………………, kami mohon penjelasan dari datuk, apo be adapt pelamaran nang taecoh pake didusun kito ko, kalu nang adapt lah diserahkan iko, cukup dan sesuailah tentu kito terimo, dan selanjutnyo kami mohonkan jugo datuk menjelaskan hokum hakamnyo dalam duduk batunangan, kami persilokan datuk.

KATO PANENGGAH ADAT NANG TAECOH PAKE DATANG MELAMAR DAN

SANGSI DIDALAM DUDUK BATUNANGAN

Oleh Datuk Pemangku Adat

BISMILLAH HIRROHMANIRROHHIM

ASSALAMUALAIKUM WARAHMATULLAHI WABAROKATUH

Nang kami hormati nenek mamak keduo belah pihak, serto nenek mamak tuo – tuo tengganai, alim ulama cerdik pandai, nang ado didalam rumah nang bapagar adapt, laman nang basapu undang, tepian nang bapagar baso, terlebih dahulu sayo angkat jari nang sepuluh, sayo tundukan kepalo nang sekok, sayo haturkan sembah nang sebuah, nang kecik dak kami sebut namonyo, nang gedang dak pula kami himbaukan gelarnyo.

Ada pun adapt nang taecih pake dalam dating duduk melamar yaitu :

1.    Cincin Sabentuk, lengkap dengan suratnyo.

2.    Pakean sapalulusan, dasar baju, selendang dan pakean dalam.

Masalah sangsi duduk batunangan itu adolah, ikat janji semayo keduo belah pihak, tando kesungguhan hati sabelah menyebalah, walaupun demikian ado jugo baiknyo sayo sampekan nang biaso dibuar di Desa / Kelurahan kito ko :

3

1.Kalu salah dijantan, tibo – tibo jantan murtad dak ndak lagi, ayam jantan di inggiran dak ado bakukuk lagi, ngorak silo, iyolah mas talucir pulang mandi, tebu saruas lendoan gajah, artinyo apo yang diantarkan iko hilang saja.

2.Kalu salah dibatino, tibo – tibo batino murtad dak ndak lagi, ayam batino dipatarangan dak bakotek lagi, mako apo nang diantarkan iko, So Balik Duo.

Itulah sangsih hukumnyo didalam duduk batunangan iko.

Sayo raso inilah yang dapat sayo sampekan, kok ado nang salah janggalnyo dalam penyampean sayo, idak pado ikan jalo ta ambur, idak pado lubuh tubo dicampakkan, mohon maaf sebanyak – banyaknyo dan saya akhiri………………..

WABILLAHI TAUFIQ WAL HIDAYAH

WASSALAMUALAIKUM WARAHMATULLAHI WABAROKATUH

PIHAK NANG NUNGGU ( PEREMPUAN )

Terima kasih kepado datuk pemangku adapt, nang telah menjelaskan adapt pelamaran nang taecoh pake didusun ko, dan setelah diperikso ternyato cukup dan sesuai, untuk itu kami atas namo Saudara…………………………….beserta keluargo besar, menerimolah antaran adapt pelamaran iko.

PIHAK NANG DATANG ( LAKI – LAKI )

Terimo kasih dan alhamdulillah kami ucapkan, kareno lamaran kami lah diterimo, kini ko nampaknyo koh kato lah saiyo, runding lah sepakat, jangan lagi direntang panjang elok dikepal supayo singkat.

PIHAK NANG NUNGGU ( PEREMPUAN )

Betul jugo kato datuk tu, kareno kini ko dak ado lagi pungguk nang manimpo kuduk, dak ado lagi ranting nang nyucuk mato,

“ DAK ADO LAGI BATEMU DENGAN TANAH NANG BABONGKAH

NANG ADO TANAH NANG BAPAYO

DAK ADO LAGI BATEMU KATO NANG BATINGKAH

NANG ADO KATO SAIYO “

            Mako :

“ CUKIK DAMAR PELITO KATAYO

DICUKUK DENGAN JARI TANGAN

KARENO KITO LAH SAIYO SEKATO

MARILAH KITO BAJABAT TANGAN “

WABILLAHI TAUFIQ WAL HIDAYAH

WASSALAMUALAIKUM WARAHMATULLAHI WABAROKATUH

3. SERAH TERIMO ULUR ANTAR

ADAT PERKAWINAN

 

BISMILLAH HIRROHMANIRROHHIM

ASSALAMUALAIKUM WARAHMATULLAHI WABAROKATUH

PIHAK NANG DATANG ( LAKI – LAKI )

Datuk – datuk tuo – tuo tengganai, alim ulama cerdik pandai, serto nang tinggi nampak jauh, nang dekat jolong basuoh, nang menapik mato pedang, nang manentang mato ari, nang bakato lebih sepatah, nang bajalan dulu salangkah, selingku bendul ditepi, selarik bendul ditengah, nang bapentas nang baperan tinggi, sekaji gedang dalam adapt, sekaji tinggi dalam paseko, nang duduk ditanggo jalan naek, nang tegak dilaman nang babucuh empat, sampe ka bale patanak, nang bakalambu asap, batirai api, babantal tumang, nang bakain singkat, bacalano basah, lepas kapanyurukpenapuran, nang bdero gelang ditangan, basintuk cincin dijari, nang basanggul lipat pandan, nang bakain ujung serong, serto segalo kito nang ado didalam rumah nang sebuah iko, rumah nang diatas batutup bubungan perak, dibawah baalas sendi gading, rumah nang bapagar adapt, laman basapu kan undang, tepian nang bapagar baso, nang kecik idak kami sebut namonyo, nang gedang idak kami panggilkan gelarnyo.

” SAIRING BALAM DENGAN BAREBAH

BAREBAH ADO DIDAUN BULUH

SEIRING SALAM DENGAN SEMBAH

SEMBAH KAMI SUSUN JARI NANG SEPULUH “

“ LAPUN MELAPUN KEMUARO

KERAP – KERAP KEANGSO DUO

AMPUN – AMPUN KEPADO NANG MUDO

MAAF – MAAF KEPADO NANG MUDO “

Datuk –datuk dari suku nang sabelah, kampong nang duo bage, adopun kedatangan kami nang sebanyak iko, nak numpang bakato agak sepatah, barunding agak sebaris, tapi sesuai dengan bunyi pantun saloko :

“ NAK NGUDUT DAK KETIK API

ROKOK NIPAH BELUM DIGULUNG

GEDANG MAKSUD DIHATI

CAKAP SEPATAH BELUMLAH DISAMBUNG “

PIHAK NANG NUNGGU ( PEREMPUAN )

Datuk – datuk dari suku nang sabelah, kampong nang duo bage, kedatangan datuk nang sarame iko, arak baserto iringnyo, kepak ka dengan rambenyo, dikami idak takejut lagi bak ditimpo tango, idak tagegau ditimpo kaso, idak pula tagamang ditimpoh upih. Kedatangan datuk – datuk ko, kami sambut dengan hati nang suci, muko nang jernih, laman lah kami sapu, tango lah kami tegakkan, lawangpun lah kami buka kan, kino ko nang ditantek lah tibo, nang ditunggu lah dating, sambil kito bateduh dibawah aur, bajunte diatas batang, sambil dengarkan pula pantun dari kami ko :

“ NAK NGUDUT DAK KETIK API

ROKOK NIPAH SUDAH DIGULUNG

KALU GEDANG MAKSUD DIHATI

CAKAP SEPATAH SILOKAN DISAMBUNG “

PIHAK NANG DATANG ( LAKI – LAKI )

Adopun kami nang dating iko, ibarat kudo pelajang bukit, ibarat biduk sampan pelayangan, jadi parang parancah semak, jadi gajah pegangkut cabe, dipanggil kami ko dating, disuruh kami ko pegi, sebagai paulas jari penyambung lidah, dari sereh nang barumpun, ayam nang barinduk, iyo lah orang tuo kami……………………………..duo laki bini dari Desa / Kelurahan……………………….Rt…………………… kedatangan     kami     kesiko,     bukit     tinggi    lah   kami   daki,   bukit   nang   idak   taterpo   angin,

1

lurah dalam lah kami turuni, lurah nang idak diturut aek, pulau batuan lah kami renangi, laut sakti lah kami layari, empang batu lah kami kalik, empang batang lah kami penggal, empang unak pun lah kami tetas, kareno nak nyari jejak nang tatukuk sejak lamo, runit nang tabentang sejak bari, iyo lah rumah saudara kito……………………………….., kino tu rasonyo ibarat orang manembak lah tepat pado sasarannyo, ibarat oaring memikat lah kaningan bunyi kutuknyo, kini kami nak nyampekan apo nang taniat di ati, apo nang tahajat didado, namun sebelumnyo sesuai dengan adapt melayu jambi, kalu batanyo salepas litak, barunding lailang penat, kareno ko tadi ado disangui sirih barang sacabik, pinang barang sakacip, rokok barang sabatang, kami persilokan datuk – datuk makan sirih kami ko agak sakapur, isap rokok kami agak sabatang, sambil dengarkan serambah orang tuo pantun anak mudo :

“ GEMUTUB BUNYINYO GENDANG

GENDANG SEBO MUARO JAMBI

SIRIHNYO KALUKUP PINANGNYO MUMBANG

IKO LAH NANG ADO PADO KAMI “

Kami persilokan datuk – datuk makan sirih kami ko, kalu taraso pahit, kami mintak dimaniskan, kalu taraso mabuk kami mintak ditawarkan. ( Sambil nyerahakn tapak sirih pinang ).

PIHAK NANG NUNGGU ( PEREMPUAN )

Datuk – datuk dari suku nang sabelah kampong nang duo bage, kedatangan datuk ko, dak salah lagi, lah pado lubuknyo jalo taambur, lah pado rantonyo rambang taserak, kalu kami bamimpi padi, kami lah bagantang dengan rangkiang, bamimpi emas kami lah badandan dengan rupo, kecik tapak tangan, Niru kami tadahkan, kecik niru laman kami bentangkan. Kalu tadi datuk mengatokan, kalu batanyo salepas litak, barunding seabis penat, dak salah lagi tu, ikolah adapt nang taecoh pake di bumi sepucuk jambi sembilan lurahpropinsi jambi, sampelah ke bumi sailun salimbai kabupaten muaro jambi dan sampe pula ke bumi Akso Dano Seti Diradjo Kelurahan Sengeti, di kami tu kenyokny basego nank samo merah, batimbang nank samo berat, kenyoknyo kasih nak dibalas dan nak digenti, tapi sebagai penantik nang tibo, panunggu nang tibo dating, kami ko ado jugo sirih barang sacabik, pinang barang sakacip, untuk itu kami persilokan jugolah datuk – datuk makan sirih kami ko agak sakapur, isap rokok agak sabatang, sambil dengarkan serambah orang tuo pantun anak mudo :

“ GEMUTUB BUNYINYO GENDANG

GENDANG SEBO MUARO JAMBI

SIRIHNYO KALUKUP PINANGNYO MUMBANG

IKOLAH NIAN MAKANAN KAMI SEARI –ARI “

Nak duo pantun sairing :

“ SIRIH KUNING DIDALAM NAMPAN

SEMAK JERAMI LAH JADI SESAP

SESAPPUN TUMBUH POHON BELIMBING

SIRIH KAMI JUGO MOHON DIMAKAN

ROKOK KAMI MINTAK DIISAP

SUDAH TU KALAGI KITO BARUNDING “

PIHAK NANG NUNGGU ( PEREMPUAN )

Datuk – datuk dari suku nang sabelah kampong nang duo bage, kini ko sirih lah samo kito makan, rokok lah samo kito isap, seri lah balek kamuko, darahlah balik ke badan, litak datuk lah ilang, penatpun lah lepas, kini ko pedang nak kami serahkan kepado pendekar, manislah diserahkan kepado gulo, terang lah diserahkan kepado siang, kelamlah diserahkan kepado malam, waktu jugolah kami serahkan kepado datuk, kami silokan tuk ……………………

PIHAK NANG DATANG ( LAKI – LAKI )

Datuk – datuk dari suku nang sabelah kampong nang duo bage, sebetulnyo idsak kami sebutkan datuk – datuk lah tau, tapi biak terang dilaras, biak nyato dialam, kami sebutkan jugo.

2

Adat padang kepanasan, adapt bumbun manyalaro, adapt tuo menahan ragam, adapt mudo mananggung

rindu, adolah anak buah anak kamenakan kami ko nang banamo ……………………….. Bin ………………………….. lah bausik sirih baguro pinang dengan anak buah anak kemenakan datuk nang disiko, nang banamo ……………………………………………. Binti …………………………………………. Lamo – lamo diok ko dak lagi nank bausik sirih baguro pinang, dioklah dimakan pinang, kini ko diok nak darah, kalu diok nyincang diok nak daging, tajelo diok nak pengebat, talintang diok nak jadi pengapit, diok nak barumah tanggo dengan anak buah anak kemenakan datuk ko, dikami nang tuo – tuo lah dicari kato sepakat, putus mufakat cobo diajukan pinangan, eh untung lagi memanggil, parajo lagi baseru, pinangan kami diterimo, mako dibuatlah ikat janji semayo, antara suku nang duo belah pihak, kampong nang duo bage, di itung – itung hari lah cukup, bulan lah genap, ditibo pula ari nang elok, dikatiko nang baik, ikat janji semayo itu nak kami tepati, kami ngantarkan adapt perkawinan nang taecoh pake disiko, namun antaran kami ko idaklah penuh keatas, penuh ketengah pun idak, barang kali Cuma penuh kebawah, maklumlah kami kokepak lah renteng, buntut lah reges, lah kami cobo takik darah kabatu, lah kami cari kuku kaijuk, idak beras antah dikisik, idak kayu jenjang dilerak, idak emas bungkal di asah, punyolah lading, pematang lengit, jangankan nak lelang, kelapo pun dak tumbuh, tumbuh sekok lah layu pulo.

“ ASAP API DIPULAU PUJUNG

BUDAK MAMAKAR SALARO KUMPEH

MAKSUD ATI MEMELUK GUNUNG

APOKAH DAYO TANGAN DAK SAMPE “

Ikolah nang dapat kami serahkan, mohon diterimo, kemudian oleh kareno lah lamo, kami lah lupo, kareno banyak kamilah ragu, mohon jugo antaran kami diperikso, maklumlah kami tadi bajalan jauh, ado tapo nang talucir, kalu lah kalagi kurang, kami mintak dicukupkan di sikolah, kalu balebih idak pulak kami bawak balik, itulah tando kito basanak.

PIHAK NANG NUNGGU ( PEREMPUAN )

Datuk – datuk dari suku nang sabelah kampong nang duo bage, kini ko yo teranglah dilaras, lah nyato di alam, bahwa antaro kito suku nang keduo belah pihak, sejak maso takalo lamo, jaman takalo bari, ado nian baikat janji semayo, tentangan anak buah anak kemenakan datuk nang nak duduk suku semendo dirumah iko, datuk – datuk nak ngisi adapt dengan lumbago, adapt jangan takalopak, lumbago jangan sumbing, baju bajait nang kito pake, jalan nang barambah nang kito tempuh, namun            datuk –datuk antar ulur dari datuk ko, kalu manis belum dapat kami telan, kalu pait belum dapat kami lepehkan, kalu barupo nasi belum dapat kami makan, kalu barupo aek belum dapat kami minum, kareno didalam rumah nang sabuah iko, kalu tinggio ado nang menanggadakannyo, kalu rendah ado pula nang mangetungnyo, kalu bakato ado nang lebih sepata, kalu bajalan dulu salangkah, nang makan ngabisi, netak mutusi, iyo lah para sesepuh adapt nang tinggi ka dengan pucuknyo, nang gedang ka dengan batangnyo. Oleh karena itu, macam mano kalu kito mintakkan petuah atau petunjuk kepado beliau nang arif bijaksano, belum pegi diok lah balik, belum dipanggil dio lah dating, nang duduk sebagai penengah dari perundingan kito hari iko.

PIHAK NANG DATANG ( LAKI – LAKI )

Benar jugo kato datuk – datuk tu, kalu diantaro kito baduo belah pihak bawak barunding, payah kito nentukannyo, kapan ndak salesehnyo, kalu ndak diserahkan kepado nang arif bijaksano, nang duduk sebagai panengah, yo kami sangat setuju sekali, bak mano kato pantun :

“ IKAN SEMURUK IKAN MENTUTU

ANAK SENGIRING DIBAWAH BATANG

KALU DATUK BACAKAP DULU

KAMI NGIRING DARI BELAKANG “

PIHAK NANG NUNGGU ( PEREMPUAN )

Yang kami mulyokan datuk pemangku adapt, nang bababat bak barau, nang babelang bak catur, pucuk ibarat jalo, siring ibarat pukat, nang tinggi serto pucuknyo, nang gedang baserto batang, kami  susun  jari  nang  sepuluh,  kami  tundukkan  kepala  nang  sekok,  diiring  sembah  nang   sebuah,

3

adolah ulur antar, serah terimo adapt nang tatuju ka rumah nang sabuah iko, dikami kenyoknyo, sangelak segan keno, sangalece segan jatuh, tapi oleh kareno kami ko hanyolah ibarat kudo pelajang bukit, ibarat biduk sampan pelayangan, bagai seligi buang-buangan, jadi gajah pengangukut cabe, dipangil kami ko dating, disuruh kami ko pergi, mako dalam hal iko, kami serahkan kepado sesepuh adapt, sembah kami naekkan, titah turun kami harapkan………silokan Datuk…………..!!!!!!!!!

KATO PANENGAH ULUR ANTAR SERAH TERIMO

ADAT PERKAWINAN

Oleh Datuk Pemangku Adat

 

BISMILLAH HIRROHMANIRROHHIM

ASSALAMUALAIKUM WARAHMATULLAHI WABAROKATUH

Nang kami hormati nenek mamak kaduo belah pihak, serto nenek mamak tuo – tuo tangganai nang ado dalam rumah nang bapagar adapt, laman nang basapu undang, tepian nang bapagar baso. Terlebih dahulu sayo angkat jari nang sapuluh, sayo tundukkan kepalo nang sekok, sayo aturkan sembah nang sebuah, nang kecik dak kami sebutkan namo nang gedang dak pula kami himbaukan gelarnyo.

Nenek mamak tuo tenganai nang sayo mulyokan, lah kito dengar basamo tadi ko, rundingan nenek mamak kaduo belah pihak, lah serentak bak langkah, lah sailun bak limbai, lah bulat aek dek pambulu, lah sakato dimufakat, namun nenek mamak menanyokan apo – apo barangnyo adapt nang taecoh pakedikelurahan kito iko, adopun nang taecoh pake dikelurahankito ko ado 9 ( Sembilan ) macam, baiklah nak sayo sebutkan sekok – sekoknyo :

1.    Kain Putih / Dasar Kelambu 12 Kabung, untuk Panutup Rasio.

2.    Pakean Sapalulusan, nang mano pakean sapalulusan iko iyolah, dasar baju pamungkus badan, kain panutup malu, salendang panutup kening, selop pangapal duri, serto kutang dan celano dalam.

3.    Kasur, untuk pembaringan rajo nang bijak.

4.    Bantal Duo, untuk pangalas kapalak.

5.    Guling Sekok, Guling untuk perebutan.

6.    Tabir Saleyer, Pembatas Rasio.

7.    Kain Kasumbo, Parimping Tikar.

8.    Benang, Jarum dan Gunting, untuk penjahit nang dak sudah.

9.    Duit Pangisi Paseko, kalu jantan e orang kelurahan kito ko lah ( Orang Dalam ) sebasar Rp. 10.000,-, tapi kalu Jantan e dari Luar Kelurahan kito ko sebasar Rp. 20.000,-

Jadi nang tasebut iko lah nang dikatokan Barang Adat Nang Taecoh Pake di Kelurahan kito ko.

Sayo raso ikolah nang dapat sayo sampekan, kok ado salah janggalnyo dalam penyampean sayo, dak pado ikan jalo taambur, idak pado lubuk tubo dicampakkan, ohon maaf yang sedalam – dalamnyo…………..akhir kalam sayo ucapkan…………………..

“ WABILLAHI TAUFIQ WAL HIDAYAH

WASSALAMUALAIKUM WARAHMATULLAHI WABAROKATUH “

~~~~~~~~~~~~~~~~~~~~~~~~~~~~~~~~~~

SANGSI DUDUK BATUNANGAN

Oleh Datuk Pemangku Adat

 

Nang kami hormati nenek mamak kaduo belah pihak, serto nenek mamak tuo – tuo tangganai nang ado dalam rumah nang bapagar adapt, laman nang basapu undang, tepian nang bapagar baso. Terlebih dahulu sayo angkat jari nang sapuluh, sayo tundukkan kepalo nang sekok, sayo aturkan sembah nang sebuah, nang kecik dak kami sebutkan namo nang gedang dak pula kami himbaukan gelarnyo.

Masalah sangsih duduk batunangan itu adalah ikat janji semayo keduo belah pihak, tando kesungguhan hati sabelah menyebelah, walaupun demikian ado jugo baiknyo sayo sampekan nang biaso dibuat di Kelurahan kito ko :

4

1.    Kalu Salah di Jantan, tibo – tibo jantan murtad dak ndak lagi, ayam jantan diinggiran dak ndak bakukuk lagi, ngorak silo, iyolah mas talucir pulang mandi, tebu saruas ledoan gajah, artinyo apo nang diantarkan iko hilang saja.

2.    Kalu salah di Batino, tibo – tibo batino murtad dak ndak lagi, ayam batino dipatarangan dak ado ndak bakukuk lagi, mako apo nang diantar iko adapt nang 9 ( Sembilan ) macam iko    So Balik Duo, Kalu Sekok Balik 2, kalu 2 Balik 4.

3.    Kalu Takeno Musibah, Umpamonyo Maninggal yang Batino, Kain Putih tinggal Untuk Kafannyo nang lainyo dibalikkan kajantan, kalu meninggal Jantan Dat nang 9 ( Sembilan ) macam tinggal dengan batino dan kain putih dibalikkan kejantan untuk Kafannyo.

Itulah sangsi Hukumnyo dalam duduk Batunangan iko.

Sayo raso ikolah nang dapat sayo sampekan, kok ado salah janggalnyo dalam penyampean sayo, dak pado ikan jalo taambur, idak pado lubuk tubo dicampakkan, ohon maaf yang sedalam – dalamnyo…………..akhir kalam sayo ucapkan…………………..

“ WABILLAHI TAUFIQ WAL HIDAYAH

WASSALAMUALAIKUM WARAHMATULLAHI WABAROKATUH “

~~~~~~~~~~~~~~~~~~~~~~~~~~~~~~~~~~

PIHAK NANG NUNGGU ( PEREMPUAN )

Datuk –datuk dari suku nang sabelah kampong nang duo bage, serto sagalo nang ado disiko, lah samo kito dengar dari pemangku adapt tadi, bahwa adapt nang diantarkan iko lah sesuai dan lah cukup, oleh kareno itu, serah terimo ulur antar adapt iko kami terimolah dengan senang hati.

PIHAK NANG DATANG ( LAKI – LAKI )

Datuk –datuk dari suku nang sabelah kampong nang duo bage, antaran kami lah diterimo berarti kami tu lepas Kebat kareno diongkar, lepas hutang kareno dibayar, untuk itu kami ucapkan terimo kasih terakhir kami samnpekan sebuah pantun :

“ DARI SUAK PUTAT KE MATANG PULE

SINGGAH SEBENTAR DIKEBUN PARAK

GAWE ADAT LAH SALESEH

KAPAN KITO NGAWEKAN SYARAK “

PIHAK NANG NUNGGU ( PEREMPUAN )

Kalu itu nang datuk tanyokan, yo kalu lah adapt lah taisi, lumbago lah dituang oleh datuk – datuk, yo sesuai pula dengan pantunnyo :

“ DARI SUAK PUTAT KE MATANG PULE

DIKEBON PARAK BARENTI MAKAN

GAWE ADAT LAH SALESE

GAWE SYARAK AKAN KITO LAKSANOKAN “

Demikianlah raso e dak ado lagi pungguk nang manimpo Kuduk, dak ado lagi ranting nang menyucuk mato, dak ado lagi batemu tanah nang babongkah, nang ado tanah tapayo, dak ado lagi kato nang batingkah, nang ado kato saiyoh, oleh karenonyo :

“ CUKIK DAMAR PELITO KATAYO

DICUKIK DENGAN JARI TANGAN

KARENO KITO LAH SAIYO SAKATO

MARILAH KITO BAJABAT TANGAN “

“ WABILLAHI TAUFIQ WAL HIDAYAH

WASSALAMUALAIKUM WARAHMATULLAHI WABAROKATUH “

4. SERAH TERIMO SADEKAH ( BAKAMPUNG )

Dari Datuk Ketua Rt. Kepada Kepala Kelurahan Sengeti

Selaku Pemangku Adat

 

BISMILLAH HIRROHMANIRROHHIM

ASSALAMUALAIKUM WARAHMATULLAHI WABAROKATUH

Alhamdulillah Hirobbil Alamin, Wassolatu Wassalam. Alaasrofil Ambiya iwalmursalim, Waala Alihi, Wassabihi Ajmain Amma Bakdu .....................!!!!!!!

Yang kami mulyokan Datuk – datuk, Tuo – tuo tangganai, alim ulama cerdik pandai, serto nang tinggi nampak jauh, nang gedang jolong basuo, nang manapik mato pedang, nang manemtang mato ari, nang bajalan dulu salangkah, nang bakato lebuh sapatah, serto segalo kito nang ado dirumah nang sabuah iko, rumah nang diatas batutup bubungan perak, dibawah nang balaskan sendi gading, rumah nang bapagar adat, laman nang basapu undang, tepian nang bapagar baso.

Bapak – bapak, Ibu – Ibu hadirin para undangan nang kami mulyokan, nang kecik idak kami sebutkan namonyo, nang gedang idak pulak kami himbaukan gelarnyo.

” SEIRING BALAM DENGAN BAREBAH

BAREBAH INGGAP DIDAUN BULUH

SEIRING SALAM DENGAN SEMBAH

SEMBAH KAMI SUSUN DENGAN JARI NANG SEPULUH “

Yang kami mulyokan Bapak/Ibu Kepala Kelurahan Sengeti, selaku pemangku adat, arus nang badengung, bungkal yang piawai, kalu pegi gena kami bakato, balik gena kami bacarito, keruh gena kami basalisih, sayo sebagai paulas jari penyambung lidah dari sirih nang barumpun, ayam nang barinduk, yaitu orang tuo kami ........................... Duo LAKI Bini, diok menyampekan bahwo kalu dak ado pagar nang magempang, dak ado batang nang malintang, Insaallah pado hari ........................ Tanggal ........... Tahun ................... yang akan datang iko, orang tuo kami .......................... Duo laki Bini nak sadekah meresmikan Pernikahan anaknyo nang banamo ..........................Bin/Binti.......................... dalam sadekah iko, beliau sadekah nak macam orang banyak, sanak jauh nak dilayangkan dengan surat, sanak dekat nak dipanggil, nang dari ulu, nang dari ilir nang dari bukit maupun nang dari teluk, kumpul gagalo disiko, oleh kareno sadekah iko sadekah sakampung, mako sadekah iko kami serahkan kepado Bapak / Ibu Lurah Kelurahan Sengeti, selaku pemangku adat  dikelurahan Sengeti iko, adaopun nang adao pado kami saat iko yaitu :

·         DAGING 30 KG

o    BERAS 30 GANTANG

§  KELAPO 30 TALI atau 60 BUAH

·         SERTO SELEMAK SEMANISNYO

Apo namo perkumpulan kito malam iko, kami serahkan kepdo Bapak / Ibu Lurah Sengeti, apao nang kami terimo insaallah nang satitik nak kami lautkan, nang sakepal nak kami gunungkan.

Demikianlah kironyo tasalah kato, tasalah lidah kami mohon maaf yang sedalam – dalamnyo, dengan sirih pinang iko sayo serahkan sedekah iko kepado Bapak / Ibu Lurah Sengeti selaku pemangku adat.

“ WABILLAHI TAUFIQ WAL HIDAYAH

WASSALAMUALAIKUM WARAHMATULLAHI WABAROKATUH “

5. KATO BAJAWAB DILAMAN

PIHAK NANG DATANG ( LAKI – LAKI )

Assalamu’ alaikum Wr. Wb

Datuk – datuk tuo – tuo tengganai, Alim ulama cerdik pandai, serto nang tinggi tampak jauh, nang dekat jolong basuo, nang manapik mato pedang, nang manentang mato ari, nang bajalan dulu salangkah nang bakato lebih sapatah, serto sagalo kito nang adao dihalaman rumah nang sabuah iko, rumah nang diatas batutup bubungan perak, dibawah nang baalaskan sendi gading, rumah nang bapagar adat, laman nang basapu undang, tepian nang bapagar baso, nang kecik idak kami sebutkan namonyo, nang gedang idak pulak kami himbaukan gelarnyo.

” SEIRING BALAM DENGAN BAREBAH

BAREBAH INGGAP DIDAUN BULUH

SEIRING SALAM DENGAN SEMBAH

SEMBAH KAMI SUSUN DENGAN JARI NANG SEPULUH “

Datuk – datuk nang dipangkal tanggo, adopun kadatangan kami nang sabanyak iko, sesuai dengan saloko adat mengatokan :

” NAK MASANG ATAP KASONYO PATAH

NAK MASANG DINDING PAPANNYO ABIS

NAK NUMPANG BACAKAP AGAK SAPATH

NAK NUMPANG BARUNDING AGAK SABARIS “

PIHAK NANG NUNGGU ( PEREMPUAN )

 Datuk – datuk nang ditengah laman, bagi lurus kami nak batanyo, apo maksud kedatangan datuk – datuk nang sarame iko, lah penuh jalan nang panjang, lah sesak laman nang ujo, apokah kedatangan datuk – datuk iko, ado dubalang marebut rampas, apo ado batin nang salah mahukum, apao ado jando nang membuat malu, kami tu maraso takejut ditimpo kaso, maraso tagegau ditimpo tanggo, meraso tagamang ditimpo upih, kedatangan datuk – datuk iko, tasesat tasalah jalan, tadorong salah simpang, nak kami tunjukkan jalan balik, kalu datuk kepatahan tongkat, nak kami gimpal, kalu kepadaman suluh nak kami bagi api,,,, itu dulu datuk – datuk...!!!!!!

PIHAK NANG DATANG ( LAKI – LAKI )

Datuk – datuk nang dipangkal tanggo, jangan salah sangko dulu, idak ado dubalang nang marebut rampas, dak ado batin nang salah mahukum, dak ado pulak jando nang mamuat malu, yang mano tadi datu mengatokan,, meraso takejut ditimpo kaso, tagegau ditimpo tanggo, tagamang ditimpo upih, nengok kedatngan kami nang sarame iko,  dami iko datang dari jauh, lah manempuh larik manitih jajuh, bukit tinggi lah kami daki,  bukit nang idak diterpo angin, lurah dalam lah kami turuni, lurah nang idak diturut aek, pulau batuah lah kami renangi, laut saktilah kami layari, empang batu lah kami kalik, empang batang lah kami penggal, empang unak lah tetas, nang selaut selamo iko, lah genting gandar pengayoh, lah lekok tepi perahu kareno dikekuk, kalu kami lah mudik kami lah sampe ke ulu, kalu kami kilir kami lah sampe ka muaro, idaklah kami maraso tasesat slah jalan, idaklah tadorong salah simpang, idak pulak kami kepatahan tongkat, ataupun kepadaman suluh, sebagai mano pepatah adat mengatokan :

“ DATUK MAMAT PEGI BAJUALAN

PEGI BAJUALAN KEMUARO JAMBI

KENYOK TASESAT TASALAH JALAN

KASIKO NIAN TUJUAN KAMI “

Kami nak nyari rumah anak nang barajo ka Bapak, kamenakan nang barajo kameman, kami nak nyari rumah Saudaro kito .................................. Apokah ibarat orang balayar, kami iko lah sampe kapulau, ibarat orang bajalan apolah sampe ke batas..... itu dulu datuk – datuk ....!!!!!

PIHAK NANG NUNGGU ( PEREMPUAN )

Kalu itu nang datuk – datuk cari kasiko, iyo ibarat orang manembak, lah tepat pado sasarannyo, kareno ikolah rumah anak nang barajo ka Bapak, rumah kamenakan nang barajo kameman ikolah rumah saudaro kito ...................... nang salaut salamo iko, lah putih mato kami memandang, lah ikal rambut dikuduk, kareno menegadah, lah jenjang leher kami kareno manengok, lah tinggi pulak tumit kami, kareno manyingkat, lah pasahan tebing kareno manunggu sanak jantan sabelah ka bapak, kami kini ko bamimpi padi, kami lah bagantang dengan rangkiang, bamimpi emas kami lah badandan ka dengan rupo, kini datuk tu kok balayar lah sampe kapulau, kalu bajan lah sampe ka batas, mako kini dengarlah saloko adatnyo :

“ CEMPEDAK DITENGAH LAMAN

AKARNYO BASUSUN TINDIH

JANGAN LAMO TEGAK DILAN

PAYOLAH NAEK KITO MAKAN SIRIH “

PIHAK NANG DATANG ( LAKI – LAKI )

Datuk – datuk nang dipangkal tanggo, sabenarnyao kami ko lah lamo nak naek karumah datuk iko, Cuma dikarenokan kami ko banyak, tentu macam – macam pulak parangenyo, mungkin ado nang rengan kaki salah langkah, rengan tangan salah Limbe, rengan lidah salah cakap, rengan mato salah liat, sabelum kami naek karumah datuk iko, kami sampekan sebuah pantun/Pertanyaan :

“ BULAN PUASO BABUNYI KETUK

MAGRIB DATANG KITO BABUKO

KAMI NAK BATANYO KEPADO DATUK

APO LARANG PANTANG KAMI NAEK KARUMAH DATUK KO “

PIHAK NANG NUNGGU ( PEREMPUAN )

Datuk – datuk nang ditengah laman, memang datuk iko orang gagah pande mamake, orang pintar padek bacakap, pado hari nang sari iko, malam nang samalam kalagi dak ado larang pantangnyo, nang ado Cuma eco pake, kalu datuk batemu nang barebo jangan diongkar, kalu batemu nang basawah jangan ditempoh, kalu nang barebo datuk ongkar, nang basawah datuk tempuh, salah menurut adat tentu takeno dendo, salah menurut Syarak tentu badoso, Cuma larang pantang naek karumah kami iko, kini ko tanggo lah kami tegakkan, lawang lah kami bukakan, kami persilokan datuk – datuk baserta rombongan naek karumah kami iko.

PIHAK NANG DATANG ( LAKI – LAKI )

Terimo kasih kami lah dibage tau apo larang pantangnyo naek karumah datuk iko, kalu macam itu kami naqk naek lah karumah datuk iko....

PIHAK NANG NUNGGU ( PEREMPUAN )

Silokan Tuk ........!!!!!!!!!

PIHAK NANG DATANG ( LAKI – LAKI )

Assalamu’ alaikum Wr. Wb......

PIHAK NANG NUNGGU ( PEREMPUAN )

Waalaikum Salam Wr. Wb .........

6. ULUR ANTAR 

SERAH TERIMO PENGANTEN

PIHAK NANG DATANG ( LAKI – LAKI )

Assalamu’ alaikum Wr. Wb

Datuk – datuk tuo – tuo tengganai, Alim ulama cerdik pandai, serto nang tinggi tampak jauh, nang dekat jolong basuo, nang manapik mato pedang, nang manentang mato ari, nang bajalan dulu salangkah nang bakato lebih sapatah, selingku bendul ditepi, selarik bendul ditengah, nang bapentas baperan tinggi, sakaji gedang didalam adat, sakaji tinggi dalam paseko, nang duduk ditanggo jalan naek, nang tegak dilan nang babucuh empat, sampe kebale patanakan, nang bakalmbu asap, batirai api, babantal tumang, nang bakain singkat bacalano basah, lepas kapanyuruk penapuran, nang badero gelang ditangan, nang basintuk cincin dijari, nang basanggul lipat pandan, nang bakain ujung serong, serto segalko kito nang ado dirumah nang sabuah iko, rumah nang diatas batutp bubungan perek nang dibawah baalaskan sendi gading, rumah nang bapagar adat, laman nang basapukan undang, tepian nang bapagar baso, nang kecik idak kami sebutkan namonyo, nang gedang gedang idak pulak kami himbaukan gelarnyo.

” SEIRING BALAM DENGAN BAREBAH

BAREBAH INGGAP DIDAUN BULUH

SEIRING SALAM DENGAN SEMBAH

SEMBAH KAMI SUSUN DENGAN JARI NANG SEPULUH “

“ LAPUN MELAPUN KE MUARO

KERAP KERAP KE ANGSO DUO

AMPUN AMPUN KEPADO NANG TUO

MAAF MAAF KEPADO NANG MUDO “

Datuk – datuk suku nang sabalah kampung nang sabagi, adopun kedatangan kami nang sabanyak iko, nak barunding agak sabaris, nak bakato agak sapatah, sesuai dengan adat melayu jambi, kalu batanyo salepas litak, barunding saabis penat, kareno kami ko tadi ado disangui sirih barang sacabik, pinang barang sakacip, rokok barang sabatang, kami persilokan datuk – datuk makan sirih kami ko agak sakapur, isap rokok kami agak sabatang, sambil mendengarkan serambah orang tuo pantun anak mudo :

“ GEMUTUB BUNYINYO GENDANG

GENDANG SEBO MUARO JAMBI

SIRIHNYO KALUKUP PINANGNYO MUMBANG

IKO LAH NANG ADO PADO KAMI “

Nak Duo Pantun Sairing :

“ SIRIH KUNING DALAM NAMPAN

SEMAK JERAMI LAH JADI SESAP

SESAPPUN LAH JADI BALUKAR

BALUKARPUN LAH JADI RIMBO GANO

SIRIH KAMI TALETAK IKO MINTAK DIMAKAN

ROKOK KAMI IKO MINTAK DI ISAP

SEBAGAI TANDO PERSEMBAHAN KAMI UNTUK PEMBUKAAN KATO “

Kami persilokan datuk – datuk makan sirih kami iko, kalu teraso pahit kami mintak dimaniskan, kalu teraso mabuk kami mintak ditawarkan .......... silokan datuk – datuk ........!!!!!!!

( “ Sambil Menyerahkan Tapak Sirih “ )

PIHAK NANG NUNGGU ( PEREMPUAN )

Datuk – datuk dari suku nang sabelah kampung nang duo bage, kedatangan datuk ko dak salah arah lagi, lah pado lubuknyo jalo taambur, lah pado rantonyo rambang tasesak, kami kami bamimpi padi, kami lah bagantang dengan rangkiang, bamimpi emas kami lah badandan dengan rupo, kecik tangan niru kami tadahkan, kecik niru laman kami bentangkan.

Kalu tadi datuk mengatokan, kalu batanyo salepas litak barunding saabis penat, dak salah lagi tu tuk, iko lah adat nang taecoh pake dibumi Sepucuk Jambi Sembilan Lurah Propinsi Jambi, sampe ke Bumi Sauilun Salimbai Kabupaten Muaro Jambi, sampe pulak Kebumi Akso Dano Setyo Diradjo Kelurahan Sengeti, di kami tu kenyok basego samo merah, batimbang nak samo berat, kenyok kasih nak dibalas, tapi sebagai penantik nang tibo panunggu nang datang, di kami iko ado jugo sirih agak sekapur, rokok barang sabatang, sambil dengarkan serambah orang tuo pantun anak mudo :

“ GEMUTUB BUNYINYO GENDANG

GENDANG SEBO MUARO JAMBI

SIRIHNYO KALUKUP PINANGNYO MUMBANG

IKOLAH MAKANAN KAMI SE ARI – ARI “

Nak Duo Pantun Sairing :

“ BILO KALUKUB BUNYINYO GENDANG

ITULAH TANDO ARAK NAK DATANG

SIRIH KALUKUB PINANGNYO MUMBANG

PAYOLAH SAMO – SAMO KITO MAKAN “

( “ Sambil menyerahkan Tapak Sirih “ )

Baiklah datuk –datuk suku nang sabelah kampung nang duo bage, kini ko sirih lah samo – samo kito makan, rokoklah samo kito isap, serilah balik kamuko, darah lah balik kabadan, litak datuk lah hilang, penatpun lah lepas.

“ NAK NGUDUT DAK KETIK API

ROKOK NIPAH BELUM DIGULUNG

KALU GEDANG MAKSUD DI HATI

CAKAP SAPATAH SILOKAN DISAMBUNG “

PIHAK NANG DATANG ( LAKI – LAKI )

Terimo kasih datuk ..............

Adopun kedatangan kami ko, ibarat kudo pelajang bukit, ibarat biduk sampan pelayangan, jadi parang perancah semak, jadi gajah pengangkut cabe, dipanggil kami ko datang, disuruh kami ko pegi, sebagai paulas jari penyambung lidah, dari sereh nang barumpun ayam nang barinduk, iyolah orang Tuo kami / saudaro kami ..........................Duo Laki Bini dari Prop / Kabu / Kec / Kel / Desa / Rt, untuk ngantarkan anaknyo yang banamo ........................... Bin / Binti ......................... Nak balik kerumah tanggo tempatnyo Menyemendo, jadi kami selaku walak warisnyo nang batanggung jawab, anak buah anak kamenakan kami iko menurut adat nang taecoh pake didaerah kito ko, kalu lah mati diantar ketanah layu, kalu tautang diantar kalidah naraco, tapi kalu lah nang sarupo iko, iyolah nang disebut batunak barumah tanggo, mako pado hari nang elok ketiko nang baik iko, dengan segalo kerendahan hati, kami serahkan kepado datuk datuk selaku walak waris nang menarimo dalam keadaan belakang dak batutup, serto kepalo dak batudung, bak keris pendek nang balengkok, keris panjang bak balimbai, dimano nang sasuai datuk letak, sepanjang masih dalam yang taecoh pake menurut adat istiadat kito, itulah maksud kami datang nang sarame iko datuk – datuk.

PIHAK NANG NUNGGU ( PEREMPUAN )

Baiklah datuk –datuk kalu itu nang datuk katokan, nampaknyo datuk ko, termasuk orang nang cerdik tau bakato, orang elok pandai memakai, bak kato pantun :

“ ANAK CINO MUDIK BAPAYUNG

SINGGA BARENTI DIMUARO BUNGO

DUDUK DITANGGO DIRUMAH DEPUTI

PANDAI NIAN DATUK MENGGAYUNG

TULANG PUTUS DAGING DAK KENO

RACUN BAGILO DIDALAM HATI “

Namun demikian datuk, dikami dak nak ngelak tuah nang datang, idak kami geleng tanduk nak tumbuh, kecik tangan niru kami tadahkan, kecik niru laman kami bentangkan, alangkah kasenangnyo hati kami nak manarimo, penyerahan dari datuk – datuk, Cuma dak elok kito barunding, sekali putus, bapikir sekali habis, baik jugo kito kaji sisik siangnyo dalam perundingsn kito iko, sebab kato orang kurang sisik rambut tumbuh, kurang siang tunas manjadi, oleh sebab itu perlu kami tanyokan kepado datuk –datuk pihak nang sabelah suku nang duo bage, tentang penyerahan datuk tadi, sebab didalam adat serah ado banyak macamnyo, ado serah patah arang, ado pulak serah patah umbut, jadi serah nang mano datuk sampaekan kepado kami iko, itu nang kami tanyokan kepado datuk – datuk.

PIHAK NANG DATANG ( LAKI – LAKI )

Kalu itu nang datuk tanyokan, adopun penyerahan nang kami maksudkan, bukan serah patah arang dan bukan serah patah umbut, sebab kalu serah patah arang, menurut adat kito selamo iko, ibarat kito malempar batu kalubuk, macam malepas kijang ka rimbo, dan serah patah umbut, samolah ayam diambur tali dipijak, baujo  bapegang ijuk, kaduonyo idak elok menurut adat kito, jadi penyerahan kami iko, iyolah serahan datuk – datuk nang pasih, biaso kito buat menurut adat paseko, kok bakampu kito nak lebar, baulas nak panjang, bukan bakmpu  lebar cabik, baulas panjang putus,  setiap itu, nak batambah tentu nak banyak, kalu batukuk tentu nak cukup, kalu dikemudian hari tumbuhnyo bakato malintang benar, kok bajalannyo malintang tapak, yo samo – samolah kito tunjuk ajar tegur saponyo, sebab anak kamenakan  datuk batino lah jadi jantan, anak kamenakan kami jantan lah jadi batino, runcing tanduknyo nak menggewang, samo – samo kito marepatnyo, tumbuh gedang kalsonyo, nang malendan samo – samo pulak kito manempahnyo, dan kalu tibo sakit peningnyo, tentu samo – samo pulak kito carikan obatnyo, wal hasil samo – samolah kito pertanggung jawabkan menurut adat nang kawi paseko, nang lazim, kok keciknyo samo – samo kito lambuk, kok rendahnyo samo – samo pulak kito anjung biak tinggi, agar menjadi cupak taladan gantang, menjadi suri taladan kain, itulah datuk – datuk arti dari penyerahan kami iko.

PIHAK NANG NUNGGU ( PEREMPUAN )

Terimo kasih - datuk datuk, kalu macam tu datuk – datuk ditetak batang padi, dianggo batang bayam, nang dikendak dalam hati, nang dicinto siang dan malam, selamo iko kami mimpikan emas, kinilah barendam rupo, mimpi padi kini lah barendam rangkiang, pucuk dicinto ulam tibo, tadi tu bukannyo kami ndak ngelak jalan, kalepas ngalicik jalan ka ilang, tapi itu sakedar sisik siang kito, dalam perundingan iko, agar mudak untuk penyelesaian silang sangketo nang timbul dikemudian hari.

Kini ko penyerahan anak buah anak kamenakan datuk kepado kami tentu kami terimo dengan segalo senang hati, namun bagi kami selaku paulas jari penyambung lidah, ayam nang barinduk yaitu, orang tuo kami / saudaro .......................... baduo laki bini sekaluargo besarnyo, Cuma datuk – datuk kalu lah memang anak kami, kalu walak dengan warisnyo adolah walak, waris orang, apo lagi datuk – datuk menyebut soal adat, adat nang sakato, eco nang sepemakai, jadi penyerahan datuk iko, kok manis belum biso kami telan, kok pahit belum biso kami ludahkan, dimano menurut eco pakai, itu ado arus nang badengung, bungkal nang piawai, dimano dioknyo, ko yang disabelah kanan kito, nang tinggi nampak jauh, nang gedang jolong basuo, nang bacakap lebih sapatah, nang bajalan lebih salangkah, nang makan ngabisi, netak mutusi, iyolah para sesepuh adat nang tinggi ka dengan pucuknyo, nang gedang ka dengan batangnyo, oleh karena itu, macam mano kalu kito mintakkan petua atau petunjuk kepado beliau, nang arif bijaksano, belum pegi diok lah balik, belum dipanggil diok lah datang, nang duduk sebagai panenggah dari perundingan kito hari iko.

PIHAK NANG DATANG ( LAKI – LAKI )

Benar jugo kato datuk –datuk tu, kalu diantaro kito ka duo belah pihak bawak barunding, payah kito nak manentukannyo, kapan nak salesainyo, kalu nak diserahkan kepado nang arif bijaksano, nang duduk sebagai panengah, yo kami sangat setuju bak mano kato pantun :

“ IKAN SAMURUK IKAN MANTUTU

ANAK SENGIRING DIBAWAH BATANG

KALU DATUK BACAKAP DULU

KAMI NGIRING DARI BELAKANG “

PIHAK NANG NUNGGU ( PEREMPUAN )

Yang kami mulyokan datuk pemangku adat, nang bababat bak barau, nang babelang bak catur, pucuk ibarat jalo, siring ibarat pukat, nang tinggi serto pucuknyo, nang gedang besrto batangnyo, kami susun jari nang sapuluh, kami tundukkan kepala nang sekok, diiringi sembang nang sabuah, adolah ulur antar serah terimo penganten, ka rumah nang sabuah iko, dikami kenyoknyo sangelak segan keno, sangalecek segan jatuh, tapi oleh kareno kami ko hanyolah ibarat kudo pelajang bukit, ibarat biduk sampan pelayangan, bagai saligi buang – buangan, jadi gajah pengangukut cabe, dipanggil kami ko datang, disuruh kami ko pegi, mako dalam hal iko, kami serahkan kepado sesepuh adat, sembah kami naekkan titah turun kami harapkan ...............silokan datuk ................!!!!!!

TITAH PENENGAH DALAM ULUR ANTAR

SERAH TERIMO PENGANTEN

Oleh Sesepuh Pemangku Adat

 

BISMILLAH HIRROHMANIRROHHIM

ASSALAMUALAIKUM WARAHMATULLAHI WABAROKATUH

Bapak – bapak / Ibu – ibu para undangan yang kami mulyokan, datuk – datuk tuo – tuo tengganai, alim ulama, cerdik pandai, serto walak waris ka duo belah pihak, nang baru sajo kito saksikan ulur antar serah terimo penganten.

Kalu kito tilik dari awal nang bamulo, akhir nang bakasudahan dari perundingannnyo tadi, nampaknyo lah sa angguk dengan katitiran, namun bunyi belum sagayo, oleh kareno itu perlu kito selaraskan, supayonyo sailun bak limbai, sebab menurut adat sabenar adat, iyolah adat nang basendikan syarak, syark basendikan kitabullah, syarak mengatokan adat memakai, kalu kawin itu beradat, kalu syarak bapaninggalan, mako perlu kito kaji sisik siangnyo, jangan kito kiro panas sampe ka petang, kadang hujan ditengah hari, sebab jodoh pertemuan, rezeki, maut, itu semua tuhanlah yang menentukannyo, mako seandainyo terjadi perceraian habis keramonyo menurut Eco pake, dalam adat kito harto tempatan tinggal, harto bawakan kembali, harto pencarian dibage duo, yo dak macam tu kamu ka duo belah pihk iko.

Baiklah kalulah saiyo, kamu ka duo belah pihak iko, nampaknyo dak ado lagi tanah nang babongkah, nang ado tanah bapayo, dak ado lagi kato nang batingkah, nang ado kato saiyo.

“ CUKIK DAMAR BUAT KATAYO

UNTUK LAMPU DITENGAH MALAM

LAH SAMO KITO DENGAR KATO NANG SAIYO

KAMI SILOKAN DATUK – DATUK BAJABAT TANGAN “

Sebagai Tando Serahan Sudah di Terimo .......................!!!!!!!!!!!!!!

“ WABILLAHI TAUFIQ WAL HIDAYAH

WASSALAMUALAIKUM WARAHMATULLAHI WABAROKATUH “

7. SYAIR BUKA LANSE

            PRIA                                         : Pegi Katoko Membeli Gambir

 Gambirlah Ado di Atas Sento

 Adu Hai Dayang Bukakan Tabir

 Nang Putih Kuning Hendak Bajumpo     

          

            WANITA                                                : Baco bismillah Sebelum Takbir

 Takbirlah Itu Awalnyo Sholat

 Bukannyo Tabir Bang Oi Sembarang Tabir

                                                              Tabir Kami Ko Tabir Ba Adat    

            PRIA                                         : Pegi ke Tebat Memancing Ikan

 Bawak Serampang Laisnyo Pepar

 Apo Syaratnyo Dek Oi Cobo Katokan

                                                              Supayo Senang Abang Membayar

            WANITA                                    : Idul Fitri di Bulan Syawal

 Bulan Ramadhan Berlalu Sudah

 Kami Lah Idak Bang Oi Memintak Mahal

                                                              Sebentuk Cincin Cukuplah Sudah           

            PRIA                                         : Ikolah Diok Semangkuk Lilin

 Lilin Semangkuk di Dalam Padi

 Ikolah Diok Dik Oi Sebentuk Cincin

                                                              Sebagai Syarat Kami Penuhi

            WANITA                                    : Serentak Bak Regam di Batang Hari

 Sailun Salimbai di Muaro Jambi

 Silokan Masuk Bang Oi ke Bilik Kami

                                                              Nang Putih Kuning Sudah Menanti

8. TUNJUK AJAR TEGUR SAPO 

KEPADO PENGANTEN BARU

 

BISMILLAH HIRROHMANIRROHHIM

ASSALAMUALAIKUM WARAHMATULLAHI WABAROKATUH

Datuk – datuk tuo – tuo tenganai, alim ulama, cerdik pandai kaum kerabat, sanak keluargo, nang kecik idak disebut namonyo, nang gedang idak pulak kami himbaukan gelarnyo, hadirin nang kami mulyokan.

Pado hari iko, hari nang elok ketiko nang baik, menjadi utang bagi kami nang tuo – tuo kepado nang mudo – mudo, untuk memberikan tunjuk ajar tegur sapo, semacam mano kato pepatah adat :

“ SEMAKIN PADEK MAKIN DIAJAR,

SEMAKIN TAU MAKIN DISAPO “

Untuk itu aninglah elok – elok, Tunjuk Ajar Tegur Sapo kami iko, adat mengatokan sekecik – kecik batang samantung dibelukar, kalu babuah lah tuo namonyo, batang pule batingkat naek, ninggalkan ruas kadengan buku, parange bujang tinggallah dibujang, parange gadis tinggallah digadis, jangan leko diujung tanjung, nengok aek anyut ka ilir, jangan leko pulak dikebun bungo, nengok bungo sedang bakembang, lupo kain idak basiring, lupo dipunggung idak baso’ ak, lupo dapur idak barasap.

Adopun tujuan perkawinan, selain membino rumah tanggo suami isteri nang baik, jugo membino hubungan duo keluargo nang akrab dan serasi, dalam adat dikatokan :

“ BAKAMPUH NAK LEBAR, BA’ ULAS NAK PANJANG

JANGAN BAKAMPUH LEBAR KOYAK

JANGAN PULAK BA’ ULAS PANJANG PUTUS “

Robah sikap sedari awal sebagai suami isteri, dalam seloko adat dikatokan :

“ UBAH TUTUR – AJAK BASO “

Misalnyo :

·         Pa’ Cik Baso Isteri, Pa’ Cik Baso Suami

·         Mamang Baso Suami, Mamang Baso Isteri

·         Bibi Baso Suami, Bibi Pulak Baso Isteri

·         Ma’ Edo Baso Isteri, Ma’ Edo Pulak Baso Suami.... dst

Dalam rumah tanggo, kalu terjadi silang sengketo atau selisih pendapat, jangan menghakimi dewek, kareno adat kito adaolah :

“ RUMAH BATANG GANE, KAMPUNG BATUO,

NEGERI BABATIN

LUAK BAPANG HULU, RANTO BAJENANG,

SERTO ALAM BARAJO “

Untuk itu tempolah semua penyelesaian secaro belembago dan bermusyawarah, dalam         Al- Qur’ an dijelaskan :

“ Jika Terdapat Gejala Perpecahan Dalam Suatu Keluargo, Mako Kirimkanlah Putusan Hakim, Dari Pihak Laki – laki dan Pihak Perempuan, ji9ka menghendaki perbaikan, Allah akan Melimpahkan Taufiknyo Kepado Mereka “

Dimaso nang katibo, mano kalo rumah tanggo nang kamu bina iko, mengalami cobaan nang silih berganti, baik nang datang dari kamu nang baduo, maupun nang datang dari pihak lain, nang membawo pertengkaran dan perselisihan.

Ingatlah anakku nang baduo, pertengkaran dan selisih pendapat adolah seni dalam keluargo, idak ado keluargo nang luput dari pertengkaran taupun selisih pendapat, kalu idak batengkar dan selisih pendapat kenyok / bukan rumah tanggo namonyo.

Oleh karena itu anakku nang baduo, hindari pertengkaran nang alkan membawo kepintu perceraian, “ Gayu Selamat “ hindari kato – kato “ Talak “ kareno kato – kato itu adolah nang dibolehakan, namun sangat dibenci Allah SWT, lebih tegas lagi “ Perbuatan Halal Tapi Amat Dimurka Allah “ Ingat Anakku, “ Allah SWT Menitip Talak Kepado Laki –laki dan Menitip Rahim Kepado Perempuan “ Tolong Dijago Baik – baik.

WAHAI ANANDA BADUO

( Keduo Penganten )

............................DAN ............................

 

Kalu terjadi pertengkaran dan perselisihan, seperti nang kami kemukokan tadi, selesaikan secepat mugkin diantaro kamu baduo, dengan caro arif bijaksano, bermusyawarah dengan penuh keterbukaan dan raso kasih sayang, jangan pulo ilang berito macam kijang lepas karimbo, macam batu tenggelam dilubuk, macam pasir ditambak ka buluh, hilang dipicit macam angin, habis digenggam macam aek.

Untuk itu, sisik sianglah elok – elok, sisik sampe ketunggul, siang sampe kedasar, kurang sisik tunas menjadi, kurang siang rumput tumbuh, supayo runding nak sampe sudah, kareno itu, dalam menimbang suatu perkaro bapadomanlah kepado orang nang tuo – tuo, “ Kok Mengaji Diatas Kitab, Kok Meratap Diatas Bangke, Mengaji Idak Bakitab - Kaji Idak kan Dapat, Meratap idak Diatas            Bangke – Aek Mato Idak Keluar “

KHUSUS KEPADO ANANDO

( Penganten Laki – Laki )

............................ BIN ............................

 

Mulai hari iko menurut adat, kamu adolah sebagai orang semendo dirumash iko, jadilah semendo nenek mamak, sesuai nang dikahendaki Adat dan Syarak, yaitu harus mempunyai sifat dan watak nang baik dan halus budi bahasanyo. “ Tau Syah dengan Batal, Tau Disukat dengan Gantang, Tau Bakati dengan Berat, Tau Membagi Samo Banyak, Dimano Bumi Dipijak Disitu Langit Dijunjung, Dimano Tamilang Dicacak Disitu Tanaman Tumbuh, Dimano Ranting Dipatah Disitu Aek Disa’ uk “.

Jangan jadi semendo Gajah Minong, maksudnyo idak tau adat dan baso kepado nang tuo, idak tau adat dan baso kepado nang mudo, idak tau adat baso dengan sanak ipar, idak tau adat dan baso dengan nang samo gedang. Jangan jadi semendo kacang Miang, belum awak datang belum orang Hiruk Pikuk, jangan semendo Langau Ijo, anak lahir awak kawin lagi digena lain.

KHUSUS KEPADO ANANDO

( Penganten Perempuan )

............................ BINTI ............................

 

Mulai dari selesai akad nikahmu, mako tanggung jawab orang tuo mu beralih kepado suamimu, sesuai dengan kedudukan sebagai seorang Isteri, mako perange gadis tinggallah digadis, kareno sudah ado ketentuan nang membatasimu baik menurut Adat maupun Syarak. Kini iko bagi anando, keataslah dikukung dahan, kabawah lah dipasung baner, kareno itu ciptakan raso cinto dan sayang, serto suasana tentram dalam rumah tanggo dan lingkunganmu.

   

Kabukit samo –samo mendaki, kelurah samo – samo menurun, kemudik serentak satang, kilir serengkuh dayung, hati gajah samo dilepeh, hati tungau samo dicecah, macam aur dengan tebing, tebing runtuh aur tabawak.

Terakhir kepado anando baduo sayo sampekan 20 Sifat nang dilarang Syarak dan dibenci Adat yaitu :

1.    Hati Selalu Bimbang

2.    Mato Selalu Rambang

3.    Perange Selalu Sumbang

4.    Orang Bajalan Lurus Awak Menyelimpang

5.    Orang Nak Nempuh Awak Mengempang

6.    Bacakap Dengan Orang Awak Membelakang

7.    Kalu Disusruh Awak Membangkang

8.    Katengah Orang Babaju Kutang

9.    Orang Nak Masuk Awak Tegak Dilawang

10.  Idak Sembahyang

11.  Banyak Hutang

12.  Hutang Gedang Dibawak Tidur Siang

13.  Kalu ditage Marah ka Orang

14.  Awak Kecik Perange Macam Orang Gedang

15.  Awak Gedang Perange Macam Kerbo Jalang

16.  Perange Jahat Macam Jelatang

17.  Siang Tidur Malam Jadi Musang

18.  Awaklah Babini Masih Ngaku Bujang

19.  Awak Tuo Mato Keranjang

20.  Babini Dengan Nang Kecik, Tapi Masih Linjang Kepado Ayuknyo Nang Gedang

“ Kalu iko Masih Dipegang, Lokak Kami Tarik Melintang “

Kami ingatkan akan nasehat Lukman kepado anaknyo dalam Al- Qur’ an surat Lukman Ayat    13 - 17 Allah SWT berfirman Artinyo :

“ Hai anakku, dirikan sholat dan ajaklah orang berbuat baik dan

Cegahlah perbuatan nang mungkar

Bersabarlah terhadap apa yang menimpah kamu

Sesunggunhnyo hal – hal yang demikian itu

Adolah hal yang diwajibkan oleh Allah SWT “

Kareno itu ananda baduo, kami ingatkan untuk senantiaso menengakkan sholat, kareno dengan sholat kamu akan tau dan sadar, “ Mano nang Halal dan mano nang Haram, mano nang disuruh dan mano pulak nang dilarang, mano nang benar dan mano pulak nang salah “

Dilain hal dengan sholat, disiplin akan tegak dan peraturan akan berjalan, begitu pulo sebaliknyo, ingatlah dalam menjalankan bahtera kehidupan berumah tanggo, agar berbhakti terhadap keduo orang tuomu, sebagai mano pantun saloko mengatokan :

“ KALULAH BABUAH RAMBUTAN NANG TINGGI

ELANG LALU TERBARAU JANGAN

KALU BATUAH LAUT NANG SAKTI

IBU DAN BAPAK DILUPO JANGAN “

Ingatlah Wahai Anando Baduo.....!!!!!!

Keridhoan Allah dibawah keridhoan Ibu dan Bapak, kemurkaan Allah dibawah kemurkaan Ibu dan Bapakmu, kemudian kepado hadirin hadirot nang kami mulyokan, sebalum kito akhiri Tunjuk Ajar Tegur Sapo iko, baik jugolah kito berikan Seuntai Pantun kepado Anando kito nang baduo iko :

3

BEBELOK JALAN KEPULAU KAYU ARO

KITO BELEBUNG DISUNGE PETE

ELOK – ELOK ANADO BADUO MENGARANG BUNGO

SUPAYO LAMO BUNGO TAPAKE

Nak Duo Pantun Sairing :

BASIKAT SAMBIL BARINGKAS

PUCUK BULUH DITENGAH LAMAN

SEPANTUN DAWAT DENGAN KERTAS

HANCUR LULUH BERCERAI JANGAN

Nak Tigi Pantun Sairing :

RANTAU MAJO TARIKAN PAPAN

GENA ORANG MENYADAP ENAU

PAYO KITO BADO’ A KEPADO TUHAN

SEMOGA ANAK KITO NANG BADUO

HIDUPNYO JAYO MATINYO SEMPURNO

Serto menjadi keluargo yang Sakinah, Mawahdah, Warohma, Amin – Amin Ya Robbal Alamin......

Demikinalah Tunjuk Ajar Tegur Sapo iko nang dapat kami sampekan kepado anando baduo, kalu licin jadikan tongkat, kalu gelap jadikan suluh, kalu tiduk jadikan bantal.

Kepado datuk – datuk tuo – tuo tangganai, alim ulama, cerdik pandai, kaum kerabat, sanak keluargo dan hadirin hadirot nang kami mulyokan, kami sangat mengharapkan kalu bajumpo anak kito iko salah langkah, salah pegang dan salah cakap tolonglah ditegur, maklumlah anak kito iko, kok umur belum setahun jagung, kok darah belum setampuk pinang, serto kok akal belum salilit jagung.

Kepado Allah SWT kito berserah diri, mudah – mudahan Allah SWT meridhoi segalo usaha kito, amin ya Robbal Alamin.................

“ WABILLAHI TAUFIQ WAL HIDAYAH

WASSALAMUALAIKUM WARAHMATULLAHI WABAROKATUH “

DISUSUN OLEH LEMBAGA ADAT MELAYU 

AKSODANO SETIO DIRAJO